Ellisras se Evangelisasie-Forum Breek die Pad Oop
12 Junie 2008 
1 Comment
NUUS VAN LIMPOPO-WES EVANGELISASIE FORUM
Ontstaan
Die Forum het in 1998 tot stand gekom toe ds. Koos Beukes, met sy aftrede, die predikante van Ellisras genader het om een van sy evangelisasiespanne oor te neem. Na ‘n paar vergaderings, en ‘n aanbod van Ds. Beukes om die tente plus ‘n vragmotor plus R45000 te skenk as ‘n wegspring, kom Di Jordaan, Griesel en Scheepers op ‘n informele basis ooreen om aan te gaan tot die stigting van die Limpopo-Wes Evangelisasie Forum. Dit loop uit op ‘n vergadering van verteenwoordigers van verskeie VGK en NG Gemeentes waar besluit is om ‘n Forum op die been te bring.
As Doel van die Forum is die volgende gestel: Om die uitbreiding van God se Koninkryk in ons onmiddellike omgewing te bevorder deur inter-gemeentelike samewerking. Die presiese omvang van die gebied sal later vasgestel word in ooreenstemming met die deelnemende gemeentes.
Die aanvanklike werkswyse is soos volg geformuleer
Die Forum sluit wat betref ons evangelisasie-span naastenby aan by die metodiek wat gebruik is deur die evangelisasie kantoor van VGK voorgestel.
Die Forum koördineer die wyse waarop die evangelisasiespan deur die betrokke gemeentelike sendingaksies benut gaan word ten einde hul gemeentelike inisiatiewe te ondersteun.
Aanvanklike medewerkers:
NGK Ellisras-Wes, VGK-Mosima, VGK-Limpopo, VGK-Seleka, NGK-Koedoesrand, NGK Vaalwater, NGK. Thabazimbi, NGK Koedoeskop, VGK Thabazimbi, NG Kerk Marken
Bondige Geskiedenis
Die aanvanklike werkswyse was dat van die onderskeie gemeentes die span uitgenooi het om in hulle gebied met hulle samewerking ‘n maandlange veldtog te onderneem. En daarna na die volgende plek te verskuif. Die plaaslike gemeente moes die opvolgwerk doen.
Aanvanklik is ‘n geweldige groot gebied bedien, wat uiteraard groot logistieke uitdagings gestel het. Dit het daartoe gelei dat uiteindelik besluit is om die Forum in twee te verdeel en so het die Kwena Evangelisasie Forum tot stand gekom, wat gekonsentreer het op die Thabazimbi-Koedoeskop- Northam gebied, terwyl Limpopo gekonsentreer het op die Marken-Steenbokpan-Ellisras-Vaalwater gebied wat deur Vyf VGK gemeentes bedien is. Van die vyf VGK-gemeentes was ds. Harold Weepener leraar van twee en konsulent van die ander drie.
Vir ‘n ruk is nog volgehou met die werkswyse van maandelikse veldtogte. ‘n Natuurramp het daartoe gelei dat metode en strategie gewysig is. Die skool by Botshabelo se dak is afgeruk deur ‘n stormwind. In samewerking met die destydse Kumba-steenkoolmyn is eers tydelike klaskamers opgerig. Terselfdertyd is daar met die departement van Onderwys onderhandel. Dit het daartoe gelei dat daar ‘n splinternuwe skool opgerig is. Toe is besluit dat die span vir ten minste drie maande daar gaan werk. Op daardie stadium was daar nie ‘n afsonderlike bedieningspunt nie, maar slegs enkele lidmate. Deur die werk van die span het daar uiteindelik ‘n “gemeentetjie” ontstaan (in werklikheid ‘n wyk van VGK Seleka) met geestelike leiers. Uiteindelik het dit ook tot die oprigting van ‘n kerkgeboutjie te Botsabelo gelei.
Die gebou was nog nie eers voltooi toe die aanliggende gemeenskappie Moöng die Forum versoek om ook daar te kom werk. Die situasie daar was soortgelyk aan die by Botshabelo – d.w.s. geen bedieningspunt net enkele lidmate. En weer een lei die werk van die span tot “gemeente-planting” en die bou van ‘n kerkie.
By die voltooiing van die gebou word die span genooi te Steenbokpan te gaan werk. Die situasie hier was in ‘n sekere sin anders as by die vorige twee plekke in die sin dat er reeds ‘n gevestigde gemeente was, maar waar as gevolg van die afwesigheid van ‘n leraar oor ‘n lang tyd redelike verval plaasgevind het en daar uiteindelik nie meer veel ‘n gemeente oor was nie. Die keuse van ‘n staanplek was ietwat problematies, deurdat op Steenbokpan self daar geen groot konsentrasie van mense was nie, maar dat daar ‘n groot dorpstigting in die vooruitsig gestel is, en dit in die lig daarvan die aangewese plek sou wees vir ‘n toekomstige kerk. Daarom is uiteindelik wel besluit om die tent langs die sokkerveld op te rig. Die keuse het aanvanklik sy kwota probleme opgelewer, juis om rede van die groot afstande wat die mense moes aflê om by die tent te kom. Intussen het die situasie radikaal verander deurdat ‘n groot plakkerkamp reg by die tent aan die ontstaan is. Die sendingveld het na die kerk gekom en vir ‘n slag was die kerk hier voor!
Die probleme by Steenbokpan het met die verloop van tyd bykans verdwyn en tans is daar nie alleen ‘n redelike leierskap vir die gemeente gevestig nie, wat al in ‘n groot mate verantwoordelikheid vir die gemeente aanvaar het, maar is ook die opkoms na die tent aan die groei.
Dit lyk vir ons in elke geval baie nodig om in oorleg met albei die gemeentes op Steenbokpan ‘n strategiese plan te gaan opstel vir toekomstige werksaamhede. Teen die einde van die boekjaar het ons ‘n versoek ontvang van Dr. Daniël Maluleke, die saakgelastigde van VGKSA Noordelike Sinode, dat die evangelisasie-span hom vir ‘n tydperk van twee maande sal kom help met ‘n deur-tot-deur evangelisasieveldtog in die informele woongebied te Ivorypark. Omdat ons dit as ‘n groot opleidingsgeleentheid vir die evangeliste beskou het om onder leiding van ‘n goed gekwalifiseerde leraar van die VGKSA. so ‘n evangelisasie-ervaring op te doen, oorweeg ons dit om die veldtog tydelik te onderbreek vir ‘n veldtog in Ivorypark, om daarna weer terug te keer na Steenbokpan.
Affiliasie
Gemeentes en individue affilieer op vrywillige basis by die Forum. Voorsiening kan Ook gemaak word vir waarnemerstatus. Waarnemerstatus kan te enige tyd beëindig word of omgeskakel word in geaffilieerde status.
Finansiële bydraes
Ten einde die werksaamhede te finansier, sal geaffilieerdes en individue gevra word om ‘n finansiële bydrae te maak. Elke gemeente of individu besluit self oor hulle bydrae. Gedurende die afgelope agt jaar het die Here op ‘n wonderbaarlike wyse voorsien. Die omset beloop elke jaar in die omgewing van R100,000 en dit is afkomstg van net ‘n paar gemeentes (NGK Koedoesrand. NGK Sesmylspruit, NGK Monumentpark en NGK Ellisras-Wes en VGK Seleka) asook indiwiduele donateurs.
Dagbestuur
‘n Dagbestuur van vyf lede vergader elke Donderdag om die werksaamhede te koördineer.
Die Forum kan ontbind word as die meerderheid van die samestellende kerkrade daartoe besluit.
Nuwe uitdagings en verwikkelinge.
Ds. Harold Weepener het . aan die einde van Oktober 2007 afgetree na ‘n baie geseënde bediening. In die laaste jare van sy bediening was hy terselfdertyd leraar van twee VGK. gemeentes, nl Seleka en Limpopo. As gevolg van vakatures in die Ring van Potgietersrus was hy ook amptelik konsulent van drie ander VGK gemeentes, nl Mosima, Machaneng en Waterberg. Die finansiële posisie van al vyf hierdie gemeentes is van so ‘n aard dat nie een van hulle ‘n leraarspos finansieel kan dra nie. Die pos van ds. Weepener is ten volle deur die NG Kerk Noordelike Sinode gedra. Die Forum het met die Sinodale Getuienis- kommissie begin gesels en deur hulle bemiddeling het ons daarin geslaag dat die SDR van die NG Kerk Noordelike Sinode uiteindelik ‘n subsidie goedkeur wat ons in staat stel om twee derdes van Ds. Hannes Peens, tentmaker-dominee van Marken se tyd uit te koop en hom as organiserende sekretaris van die Forum aan te stel. Sy primêre taak sal wees die opleiding, toerusting en bemagtig van die vyf VGK-gemeentes. Hy is die taal redelik goed magtig en het reeds ‘n groot deel van die gebied saam met ds Wepener besoek en kontak met die verskillende VGK-gemeentes se kerkrade gemaak. Hy het in ‘n onderhoud laat blyk dat dit nou reeds duidelik is dat heelwat tyd en aandag gegee sal moet word aan die toerusting van ouderlinge en kerkleiers, in die lig van die groot verantwoordelikhede wat hulle dra en die tekort aan leraars en aan fondse om poste te skep en te vul. Hy is tans ook besig met ‘n M-skripsie oor missionale tranformalsie onder leiding van dr Jurgens Hendriks, emeritus professor van die Teologiese Fakulteit van die Universiteit van Stellenbosch.
Personeel
Aanvanklik het die tentspan uit vyf lede bestaan. Na die verdeling met die afstigting van Kwena het drie spanlede na Kwena verhuis het ons met slegs twee agtergebly. Ons was toe verplig om nog een te werf, ‘n gemeente-seun van die VGK-gemeente Seleka, Nadat twee ander evangeliste na ‘n ander werksterrein verskuif het, is daar weer ‘n nuwe spanlid gewerf. Omdat dit nuwe werkkragte was, is die as noodsaaklik beskou om in-diens-opleiding te verskaf en het ons hulle ingeskryf as studente by die Nehemia Bybelinstituut. Die bedanking van een lid en die onverwagse afsterwe van nog een het ons in ‘n redelike krisis laat beland, deurdat net een lid van die span oorgebly het. Maar weereens het die Here op ‘n wonderbaarlike wyse voorsien toe nie minder nie as drie lidmate van die VGKerk hulle kom aanmeld het. Dit plaas ons voor ‘n nuwe finansiële uitdaging om ‘n addisionele R60,000 te vind.
Soortgelyke artikels:
Desiree,
Jammer dat ek nou eers reageer. Indien jy spesifiek met die Limpopo-Wes Forum wil kontak maak, wat in die Elleisras-omgewing werk, kan jy met ds Hannes Peens skakel. Sy kontakbesonderhede is soos volg: e-pos: hpeens@lantic.net en sy tel nrs is 014 765 0205 en 082 8866 077
Ds Andries Louw
anelouw@getuienisforum.org.za ; sel: 083 276 4476